الاثنين، 7 فبراير 2011

January favourit


سلام من زمان ما نزلت بوست لاني كنت ناسيه الباسوورد غير الشغل اليوم بنزل بوست ادري وايد متاخر بس ما عليه انزله متاخر احسن من ما انزله كلش الموضوع باين من عنوانه بهالبوست راح اتكلم عن المنتجات اللي استخدمتها وايد بشهر يناير وعجبتني
بسم الله نبدي
اول منتج من جفنشي mat and glow فيه 6 الوان تقدرين تستخدمينه كبلشر يعطيج لون برونزي يهبل او تستخدمينه eye shadow انا اكثر شي استخدمه كشدو وخصوصا الالوان اللي بالوسط غليتر يهبلووون خلصتهم يعني انا مابي امدح فيه وايد لانه كفايه انه من جفنشي انا عندي جفنشي و لانكوم احلى شي بمكياج الماركات غير هذا ترى كل بلشرات جفنشي يهبلون وحمرهم اتينن بعد






وانا كنت استخدم الالوان بالوسط يعطوني مثل لوك اللي بالصوره



قلوسات جفنشي ايهبلووون يخلون شفايفج تبرق تبرق انا عندي 3 قلوسات يولي هديه من خالتي الله يخليها لي حدي استانست عليهم وناويه عالباجي انشالله


حمره من ريميل اول شي ما عجبتني لانه فيها لمعه حسيتها اوفر مادري شلون خذيتها الظاهر اللي ببوتس اوقفت فوق راسي لمن
استحيت وخذيتها غير هذا لونها وايد فاهي عشان جذي استخدمتها كترطيب شافتها رفيجتي علي ووايد عجبتها فقمت شنو احطها مع اي حمره عشان افتحها يعطيها لون حلو اهيا من ريميل واسمها دريمي ثاني وحده عاليمين





وهذي صورتها وايد عجبني الباكينجيغ

ثاني منتج عطر رهيييييب يهبل يهبل انا شريته باخر الصيف بس ما استخدمته وايد لان بعدها فتره قصيره اختي شرتلي marry me من لانفن فتعرفون اذا عطر يديد تجلبون فيه بس لان الجو صار بارد قلت بغير وابي عطر شوي اثقل فرديت عليه الله وكيكلم بشهر طيرته اتسبح فيه يهبل اسمه guilty by gucci الشي الوحيد اللي ما عجبني شكله مادري احسه fake ومو انثوي وانا وايد يهمني شكل العطر بس انصحكم فيه للاسف ما اعرف اوصف العطر بس اهوا عطر حق الليل او الشتا لان شوي ثقيل اي وبعد اللي مو حلو فيه انه تواليت مو برفيوم يعني ما يطول 3 ساعات بالكثير السعر جنه ب 27

ثالت منتج حبيبي هذا ما استغنى عنه دوم بجنطتي كومباكت فاونديشن من ماكس فاكتور استخدمه كاساس للصبح وايد حلو وخفيف ماقدر اقول تغطيه ممتازه لانه بودره بس يهبل خفيف جنج مو حاطه شي بويهج وبعد استخدمه بالصيف اعدل في اساسي عموما اهوا معروف وهذي ثاني مره اشتري منه السعر مو متاكده بس اتوقع ب 5 شي جذي
هذا بعد 2 مره اشتري منه من بودي شوب اسمه eyemakeup remover اهوا سائل مو كريم الحلو فيه سهل الاستخدام يشيل مكياج العين بضمير ما يدبق غير هذا منتج اقتصادي لان يتم معاكم فتره طويله انا تم معاي تقريبا 5 اشهر وسعره حلو ب دينارين انصحكم فيه يستخدم معاه قطن المدور المسطح اتمنى فهمتو علي ما اعرف اشرح :p
وبس اتمنى انكم استفدتو او خذيتو فكره وهالشهر ناويه على وايد شغلات انشالله اجربهم واسوي ريفيو عليهم

الاثنين، 17 يناير 2011

PINK PASTA ^_^


سلااااااااااااااااااااااااااااااااااااااام
مساء الخير مساء الورد مساء الالف دينار :P مساء اليوع اليوم بقولكم عن طبقي المفضل الحلو فيه انه طبق خفيف ما يشبع على قوله اختي بس انا بالنسبه لي كافي ووافي وسريع ومقاديره متوفره بكل مطبخ الا وهو البنك الباستا اللي يحبون باستا شوكليت بار اضمن لكم ان باستتي احلى من باستا شوكلت بار الا اذا الاهل يجاملون هذا شي ثاني بسم الله نبدي :
المقادير :
معكرونيه مسلوقه الشكل اللي انتي تفضيلنه انا افضل المعكرونيه الطواليه اللي على شكل اصابع انشالله فهمتو علي

بصل وسط تقطعينه صغار اذا ما تحبين البصل لا تكثرين وااايد انا احط شويه يعطي طعم

1مكعب ماجي

فصه ثوم

طماطه مهروسه بدون قشر

معجون طماط
ثلاث ارباع علبه كريمه حمره

ربع علبه جبن كرافت تشيدر مبشور


ملعقتين اوريغانو

الطريقه :
طريقه الصلصه : نحمس البصل ونحط عليه الثوم ومكعب ماجي فوقه الطماط المهروس بعده معجون الطماط والاريغانو بعدين صبي الكريمه الحمره شوي شوي لمن يصير لونها وردي فاتح بعدها حطي جبن كرافت خلطيهم عدل وصبيهم فوق المعكرونه وزينيها بالمزرولا وبالهنا والشفا

السبت، 15 يناير 2011

كريم يستحق التجربه st.ives





سلام عليكم
شلونكم شخباركم مع هالجو الممطر الجميل بما ان احنا بالشتا ويقوم سوق الكريمات بهالجم شهر بس هبابنا نلطخ ونرد لي ورا بقولكم تجربتي عن افضل الكريمات اللي استخدمتها اول شي بقولكم عن كريم عجيب بيوم من الايام وانا احوس بجمعيه الزهرا طبعا انا اذا ما عندي شغل كله تلاقوني احوس بالجمعيات امشي واشمشم بهالكريمات جود اطيح على كريم يديد ينال على اعجابي والا تييلي وحده وتجلب الا تجربين هالكريم حطتلي منه وطحت في هواه يا هلي سمو علي اسم الكريم st.ives صناعته سويسريه سعره بدينار وشي مو ذاكره
انا دايما اخذ كريماتي من فازلين واحب ريحه الخيار بس هذا ريحته احلى وهذا فازلين الخيار


وهذا البديل اللي وجهه نظري ترطيبه احسن وريحته بعد احلى



my wish list #1




















dior sheepskin

الجمعة، 14 يناير 2011


داشه بقوه ما مداني اكتب بوست بس من كثر ماني متحمسه بهالموضوع ما قدرت انطر
اللي يعرفني عدل مدل بيعرف ان اول بوست لي بيكون عن شنو :p
اكييييييد عن الكتب
انا احب اقرا يمكن هذا الشي الوحيد اللي ظل معاي كل هواياتي الثانيه كانت مجرد هبات للاسف يتلي فتره قطعت لاني لهيت بالدراسه بالاضافه ان ابوي كان مانعني لان الابلات كانو يشتكون مني ما علينا فيوم تخرجت رديت وبقوه فعاهدت نفسي اني اقرا 100 كتاب قبل ال21 ادري صعبه بس بحاول المهم مالكم بالطويله الكتاب اللي بتكلم عنه عجييب اضمن لكم ان اذا مسكتوون ماراح تهدونه من حلاته اهوا بالحقيقه 3 كتب مو كتاب واحد اساميهم بالترتيب ( زهره الصحراء فجر الصحراء وبنات الصحراء ) يمكن يكون مار عليكم اوبرا تكلمت عنه عاده اوبرا كل كتبها اللي تتكلم عنها مو شي وتبالغ في مدحها بس هالكتب صج تسوى عالعموم ماكو فايده لازم اتحلطم المهم كتاب يتكلم عن قصه حياه عارضه ازياء صوماليه اسمها ويرريس دايريه . ويريس اسم صومالي معناه نوع من انواع الورد بهالسلسه تتكلم عن طفولتها كبنت صوماليه ,عمليه ختانها , زواجها , هروبها الى لندن . عملها كعارضه ازياء , حمالها , الصعوبات اللي واجهتها واخيرا رجوعها الى الصومال والاوضاع السياسيه المتدهوره هناك الكتاب وايد يشد ووايد حلو ويفسرا الفروقات بين عادات المسلمين و عدم تقبل المجتمع الغربي له اخاف اكمل احرق القصه بس صح انصحكم فيه وبشده وانشالله يعجبكم وقراءه ممتعه
السلام عليكم
اممم مادري شقول هذا اول بوست لي بهالبلوق فغالبا راح يكون تعريفي
منو انا ؟
انا بنت كويتيه في مقتبل العمر 20 عاما من العطاء طالبه في الجامعه تخصصي محاسبه وتوقع الحين عرفتو اهم شي
احب اقرا احب اشوف افلام اعشق العنايه بنفسي ومتابعه ممتازه للموضه مع اني اغلب الاحيان ما احب اطبقه بنفسي
اتوقع اصعب شي حق اي شخص انه يعرف عن نفسه انا نفسي ما كنت اعرف نفسي ليما انحطيت بموقف اني لازم القي خطبه اعرف فيها عن نفسي انا انسانه بسيطه احب الكانتري حلم حياتي اسافر الهند وايد احب الهند واحب شعبها وثقافتها اممم مالي خلق اقرق الصراحه فبكتفي بهالشي ولان الصراحه ماحب اتكلم عن نفسي وايد باختصار هالبلوق بيتكلم عن حياتي اليوميه تساؤلاتي تجاربي شغلات حبيتها
الى اللقاء مع بوست يديد :)